#ميثولوجي_أمين_رع
نظرية خلق الكون فى هيرموبوليس و الثامون الاشموني.
4
1-2
أبناء الشمس، شعب كمت العظيم،
انهاردة هنتكلم فى موضوع انا شخصيا شغوف بية جدا من فترة طويلة، اللى هو المعتقد الاشموني و نظرية الخلق عند عند كهنة هيرموبوليس. كالعادة هنبدأ بمدينة النشأة.
بسم الله نبدأ،
-هيرموبوليس.
-تحوت.
-الثامون.
-الشعوب الاخري.
-الهرمسية.
-الغنوصية.
-هيرموبوليس، هى مركز الاشمونيين حاليا بمحافظة المنيا. مش هتلاقي فى التاريخ البشري كلة مدينة روحية اكثر غموضا و اثارة من هيرموبوليس، اللهم مدينة "أ جارتا " السرية فى التبت.اجدادنا سموها خمنو، الجمع من خمن يعني الثامون نسبة لمعتقدهم. تطور الاسم فى القبطية المصرية لشمون و بعدين فى العربية للاشمونيين. الاغريق سموها هيرموبوليس، مدينة هيرمس. الاسم الاغريقي للنتر تحوت.
-تحوت هو نتر الحكمة و العلوم و المعرفة عند اجدادنا. هو رسول السماء و مهدي اللغة للبشر و اهدانا التقويم كمان، اول شهر فى السنة المصرية هو شهر توت و بيسمي بالتقويم التوتي نسبة لتحوت و ينسب لة تقسيم السنة ل 365 يوم بدل 360 يوم فى قصة تانية مشهورة.
-لتحوت اسماء عديدة جدا منها، قاضي الالهين المتحاربين، المعظم مرتين، المعظم ثلاثا، سيد السماء، الغامض، المجلل بالاسرار، الصامت، جمال الليل "لارتباطة بالقمر"، المهيب العظيم، صانع السلام الذي يسكن أننو، الالة العظيم فى معبد أبتيتي.
-فى العصر الروماني تقدس بشكل كبير جدا و سموة، قلب رع و لسان تانتن، و حنجرة ذاك الذي اسمة خفي "الالة الخالق" ، يعني هو تصور العالم كما تصورة رع و استدعاه للوجود بالكلمة زي بتاح و بالنظام المحدد زي أمون و نظم الكون و حافظ على توازنة كماعت محافظا على العلاقة بين الاشياء. - الرجاء مراجعة المقالات السابقة-
-عرفنا من نصوص تسابيح رع فى كتاب الموتي و نصوص جنائزية اخري، ان تحوت و ماعت انبثقا مع رع من اعماق النون، يعني وجدوا بالتزامن مع رع، عشان كدا دايما بنلاقيهم الاتنين بجوارة فى قاربة المشهور، و لان حركة الاجرام السماوية نسبت لتحوت فاعتقد المصريين ان كان لة دور مهم فى توجية قارب رع.
-كمان وصلنا نص من العصر المتأخر بيوصف اسماء و اماكن عبادة تحوت وصفتة ب "الة خيمنو الواحد خالق نفسة الالة الذي لم يهبة احدا ميلادة"
"هو الذي يحسب فى السماء و الذي يعد النجوم و الذي يقيس الارض و يحسب كل ما عليها"
"قلب رع انبثق من الالة تحوت"
- هو "قلب" و "عين" رع و منفذ ارادتة على الارض ، و كمان لعب دور مهم جدا فى محاكمة الموتي، خصوصا فى مشهد وزن القلب، بنلاقية واقف ماسك قلم وورقة بردي و بيسجل المحاكمة ووزن قلب المتوفي مقابل ريشة ماعت، ريشة العدل و التوازن الكوني. تحوت لعب دور مهم جدا فى الحفاظ على التوازن الكوني ، ففي كل معركة بين الخير و الشر، النظام و الفوضي كان تحوت موجود. فى صراع رع مع أبيب ، و صراع حورس مع ست. و لما يتغلب واحد ع التاني كان بيتدخل لعلاجة لضمان استمرارية المقابلين بدون ان يتغلب احدهما على الاخر
-برجاء مراجعة الجزء الخاص بازدواجية الوجود "duality" فى الحلقة الاولي- لضمان استمرارية الكون و التوازن، زي ما عالج عين حورس بعد ما فقأها ست مثلا.، و علم ايزيس اسم رع الاعظم السري عشان تقدر ترجع اوزوريس للحياة و تنجب منة حورس.هو حافظ العلوم الالهية، و المسئول عن حركة الكواكب و الاجرام السماوية.
- تم عبادة تحتوت عند شعوب اخري أبرزها الاغريق، سموة هيرميس، هيرميس ثلاثي العظمة او العظيم ثلاث مرات. مرتبط بقرد البابون و طائر ابو منجل. و عبدة الرومان كمان.
-لعب فى هيرموبوليس دور أعظم بكتير كالة خالق بشكل صريح و بنعرف من نصوص معبد ادفو، ان صفاتة " هو الذي يخلق".
-> بسبب التشابة فى الصفات بينة و بين شخصيات ابراهيمية زي النبي ادريس فى الاسلام، واخنوخ فى العهد القديم فى ناس خلطت ما بينهم، الحقيقة ان دة كلام مش اكاديمي و معندناش اي دليل علية.
ممكن اقعد اتكلم عنة لوحدة للسنة الجاية، كفاية كدة.
طيب اية هو بقي الثامون دة اصلا و ازاى اعتقدوا انهم خلقوا الكون.
- فى الاعتقاد دة ان قبل اتوم رع، وقبل كل الالهة تواجدت فى محيط الفوضي و العدم الازلي -Nun- اربع عناصر كونية هى السبب الاساسي فى الوجود مع مقابلاتها الانثوية، كالاتي:
نون- ناونيت: دول رمزوا للمياة الازلية و السماء فوقها.
أمون-أميونيت: دول رمزوا للخفاء، للمجهول دراسات حديثة بتقول الهواء او الجاذبية.*
حيح - حاوحيت: دول رمزوا للانهائية و الخلود.
كيك- كاوكيت: الظلام / الفوضي.
حصلت تغيرات و اضافات لاحقة خصوصا فى العصر الروماني. "الذكور" كانوا بيترسموا بأجساد رجال و رؤوس ضفادع، و "الاناث" بأجساد سيدات و رؤوس افاعي. الاتنين رموز شهيرة للخصوبة، لانهم اعتقدوا انهم عاشوا فى المحيط الازلي قبل خلق التل الازلي و انهم السبب فى تخصيب المياة الازلية وبداية الخلق.
المثير بقي هنا، انهم معتقدوش انهم الهة حية بل بالعكس، هما اعتبروهم الهة خالقة و ماتت، مدينة هابو الشهيرة دي كانت النكروبوليس بتاعهم، لو انت عندك فكرة عن الهة الاوليمب و التايتانز-كانوا بيحكموا قبل الهة الاوليمب- هتفهم الفكرة هنا فى الحقيقة هى الفكرة متاخدة مننا اصلا. الثامون كانوا العناصر الخالقة الاولي للكون اللى سمحت بوجود عالم و حكم للالهة من الاساس. يبقي الخلق بدأ فى خمنو بظهور التل الازلي و خلق الشمس. و ماتوا و "مقبرتهم" او مثواهم الاخير فى مدينة هابو.
- انا شايف ان كدة كفاية انهاردة. هسيبكم مع دعاء لوزير لامنوفيس (امن حتب) الثالث فى ذروة عهد الإمبراطورية لتحوت :
التحية لك.
يا سيد الألفاظ الإلهية.
يا من ترأس الشعائر المحجوبة.
وتستقر فى السماء وعلى الأرض.
الإله العظيم منذ الأزل.
ذو الأصالة.
مخترع اللفظ والكتابة.
يا من تعمل على تزايد الدور. وتؤسس المساكن.
يا من تحيط الآلهة علما بدورها.
و كل فن بقواعدة.
و الاقطار بحدودها، و كذلك الحقول.
فى حلقة يوم الجمعة هنتكلم عن انتقال عبادة تحوت للاغريق، و هنتكلم عن علاقتة بالسحر، هنشرح يعني اية هرمسية و يعني اية غنوصية. مش عشان هما اجزاء من الديانة المصرية لكن عشان هما نتاج العقيدة دي بشكل مباشر.
المصادر:
Geraldine Pinch, Handbook of Egyptian Mythology
The Complete Gods and Goddesses of Ancient Egypt: Richard H .
و رحم الله العظيم سليم حسن طبعا.
ليست هناك تعليقات:
إرسال تعليق